सरपंच संतोष देशमुख हत्या प्रकरण आणि बीड जिल्ह्यातील दहशतीवरून मंत्री धनंजय मुंडे यांच्यावर गेले काही दिवस सातत्याने जोरदार हल्लाबोल करणारे भाजपचे आमदार सुरेश धस यांनी मुंडेंना भेटल्याचे समोर आल्याने मोठे वादळ निर्माण झाले. यावरच मराठा आंदोलक मनोज जरांगे यांनी प्रतिक्रिया देत सुरेश धस यांच्यावर सडकून टीका केली आहे. आष्टीमध्ये मुख्यमंत्री देवेंद्र फडणवीस यांची सभा झाली. त्याचवेळेस या सगळ्याची सुरुवात झाली असावी अशी शंका जरांगे यांनी व्यक्त केली.

"निवडणुकीपूर्वी मी फक्त तुमचा होतो, आणि निवडणुकीपुरतंच मुंडे घराण्याला शत्रू मानलं. प्रत्यक्षात, आमच्यात असं काही नव्हतं; हे सगळं केवळ जनतेला भासवण्यात आलं. गोरगरीबांकडून मते मिळवण्यासाठी सुरेश धसांनी फक्त राजकारण केलं.अशी टीका जरांगेनी केली."

तसेच "पंकजा मुंडेंनी तुम्हाला निवडणुकीत पराभूत करण्याचा प्रयत्न केला, पण मराठ्यांनी तुम्हाला उचलून धरलं, तुम्हाला पराभूत होऊ दिलं नाही.मात्र, धनंजय मुंडेनी आपले पोर मारून टाकले तरी तुम्ही त्यांना भेटायला गेले." असे म्हणत जरांगेंनी धसांवर निशाणा साधला.

जर कोणी तुम्हाला जबरदस्तीने बदनाम केलं असतं, तर आम्ही तुमच्या बाजूने ठाम उभे राहिलो असतो. पण तुम्ही मुंडे परिवाराला जाऊन भेटलात, हे सगळ्यांनी पाहिलं. मराठ्यांची फसवणूक करून आणि गोड बोलून तुम्हीच मराठ्यांचे मुंडके उडवले, असा जोरदार आरोप मराठा आंदोलक मनोज जरांगे पाटील यांनी सुरेश धसांवर केला.