सुरेश धसांनी धनंजय मुंडेंवर 73 कोटींच्या घोटाळ्याचे आरोप केले आणि बीडमध्ये आलेल्या पालकमंत्री अजितदादांच्या हाती भ्रष्टाचाराचा कच्चा-चिठ्ठा असलेला पेन-ड्राईव्हच दिला....त्यामुळे जिल्हा नियोजन समितीची बैठक वादळी ठरणार हे स्पष्ट झालं होतं... आणि त्यानुसारच बैठकीत धनंजय मुंडेंनी धसांना शह देण्यासाठी बीडमधील दहशतीचा मुद्दा उपस्थित केला...मात्र धसांच्या मदतीला पवारांच्या राष्ट्रवादीचे खासदार बजरंग सोनवणे धावून आले आणि दोघांनी मुंडेंना घेरण्याचा प्रयत्न केला. त्यातूनच मुंडे विरूद्ध धस-सोनवणेंमध्ये अजितदादांसमोरच जोरदार बाचाबाची झाली.

हे सगळं एवढ्यावरच थांबलं नाही तर धसांनी 73 कोटींच्या घोटाळ्याच्या चौकशीची मागणी अजितदादांकडे केलीय....त्यावर 5 वर्षांचीच नव्हे तर गेल्या 15 वर्षांची चौकशी होऊ द्या असं आव्हानच मुंडेंनी धसांना दादांसमोर दिलं...

प्रत्येक जिल्हा नियोजन समितीच्या बैठकीत निधी वाटपावरुन सत्ताधारी आणि विरोधक नेहमी आमने-सामने येतात... मात्र अजितदादांना पहिल्याच बैठकीत बीडच्या वादग्रस्त राजकारणाची झलक पाहायला मिळाली... हत्या, दहशत, आणि घोटाळ्यांवरून गाजलेल्या बीडच्या नेत्यांना अजितदादा कसं हाताळणार याबाबत सर्वांना उत्सुकता लागलीय.