बीड सरपंच हत्या प्रकरणातील मुख्य आरोपी सुदर्शन घुले याला पोलिसांनी पुण्यातून अटक केली आहे. या आरोपीचा ठावठिकाणा डॉ. वायभसे याच्यामुळे समजला आहे. आरोपींना फरार करण्यात डॉ. संभाजी वायभसे हा मास्टरमाईंड असल्याचं पोलिसांच्या तपासतून समोर आलं आहे.

बीडचे माजी सरपंच संतोष देशमुख यांच्या हत्या प्रकरणाच्या तपासाला वेग आला आहे. वाल्मिक कराडच्या सरेंडरनंतर आता पोलिसांनी आज मुख्य आरोपी सुदर्शन घुले याला देखील बेड्या ठोकल्या आहेत. या प्रकरणातील तिन्ही आरोपींना फरार होण्यास मदत केल्याच्या माहितीवरून काल डॉ. संभाजी वायभसे याची वकील पत्नी आणि एकाला काल एसआयटीने नांदेडमधून ताब्यात घेतलं. त्यानंतर वायभसे याला पोलीसी खाक्या दाखवल्यानंतर त्याने सर्व माहिती पोलिसांना दिली आहे. मुख्य आरोपीसोबत वायभसे याने संपर्क केला होता. तसंच त्याला पैसे देखील पुरवले होते. त्यामुळे आरोपींना पळवणारा मास्टर माईंड हा वायभसे असल्याचंच यावरून दिसून आलं आहे.