बॉलिवूड अभिनेता सोनू सूद पुन्हा एकदा मदतीसाठी पुढे आला आहे. सोलापूर जिल्ह्यातील सीना नदीला आलेल्या पुरामुळे अनेक कुटूंबांचे मोठे नुकसान झाले असून, त्यांच्यासाठी मदतीचा हात पुढे करत सोनू सूदने सोशल मीडियावर एक व्हिडीओ शेअर करत या संदर्भात माहिती दिली आहे. त्याबद्दल तो म्हणाला, “सोलापूरमध्ये पूरस्थितीमुळे नागरिकांना मोठ्या अडचणींचा सामना करावा लागत आहे.

आमची टीम प्रत्यक्ष माहिती घेत असून, गरजू कुटुंबांपर्यंत आम्ही खाण्याचे साहित्य व मेडिकल किट्स पोहोचवण्याचे काम सुरू केले आहे.” तसेच, लवकरच सोलापूरमध्ये भेट देऊन परिस्थितीचा आढावा घेण्याचे आश्वासनही सोनू सूदने दिले आहे. कोरोना काळात तसेच विविध आपत्तीच्या वेळी लोकांना मदत करणारा अभिनेता म्हणून त्याची ओळख निर्माण झाली असून, पुन्हा एकदा पूरग्रस्तांसाठी तो धावून आला आहे.