परभणी घटनेत मृत्यू झालेल्या सोमनाथ सूर्यवंशी यांचा मृतदेह परभणी येथेच घेऊन जाण्यात येणार आहे. सूर्यवंशी यांच्या आईने पोलिसांना दिलेल्या जबाबात मृतदेह परभणीला घेऊन जाणार असल्याचं म्हंटलं आहे. त्याप्रमाणे आता हा मृतदेह घेऊन नातेवाईक परभणीकडे रवाना झाले आहेत. छत्रपती संभाजीनगरच्या घाटी रुग्णालयाबाहेर सोमनाथ सूर्यवंशी यांच्या नातेवाईकांनी प्रचंड गर्दी सध्या केलेली आहे. यावेळी सूर्यवंशी यांच्या आईचा काळीज पिळवटणारा आक्रोश याठिकाणी बघायला मिळत आहे. आंबेडकरी अनुयायांकडून देखील यावेळी मोठ्या प्रमाणात प्रशासनाविरोधात घोषणाबाजी करण्यात येत आहे.

परभणी येथील डॉ. बाबासाहेब आंबेडकर यांच्या पुतळ्यासमोरील संविधानाच्या प्रतिकृतीची विटंबना करण्यात आल्याची घटना घडली होती. यात आंबेडकरी समर्थकांनी आंदोलन सुरू केल्यावर या आंदोलनाला हिंसक वळण लागलं यावेळी पोलिसांनी काही आंबेडकरी समर्थक कार्यकर्त्यांना तब्यात घेतलं होतं. यावेळी पोलिसांच्या कस्टडीत असलेल्या सोमनाथ सूर्यवंशी या कार्यकर्त्याचा मृत्यू झाला आहे. त्यामुळे संताप व्यक्त करण्यात येत आहे. दरम्यान, आता मृत सोमनाथ सूर्यवंशी यांचा मृतदेह परभणी येथेच घेऊन जाण्यात येणार असल्याचं सूर्यवंशी यांच्या आईने पोलिसांना दिलेल्या जबाबात म्हंटलं आहे.