केंद्रीय गृहमंत्री अमित शाह यांनी डॉ. बाबासाहेब आंबेडकर यांच्या बाबतीत केलेल्या वक्तव्याचे सोलापुरात पडसाद उमटताना दिसून आले आहेत. सोलापूर कृषी उत्पन्न बाजार समितीत रात्री 12 वाजता माथाडी कामगारांचे गृहमंत्री अमित शाह यांच्या विरोधात आंदोलन केलं. कृषी उत्पन्न बाजार समितीतील माथाडी कामगार बाजारात आलेला कांदा उतरवण्यास तयार नसल्याचं दिसत आहे. अमित शाह हे जोवर माफी मागत नाही तोवर माल बाजारात उतरवला जाणार नाही, अशी भूमिका घेतली आहे. त्यामुळे या ठिकाणी आलेल्या कांद्याच्या गाड्या तशाच उभ्या असल्याचं बघायला मिळत आहे. बाजार समितीमध्ये अमित शाह यांच्या विरोधात जोरदार घोषणाबाजी माथाडी कामगारांकडून केली जाते आहे. अचानक सुरु झालेल्या या आंदोलनानंतर पोलिसांनी तात्काळ घटनास्थळी धाव घेत परिस्थिती आटोक्यात आणण्याचा प्रयत्न केला. यावेळी पोलिसांकडून आंदोलकांची समजूत काढण्याचे प्रयत्न सुरु आहेत.

सोलापूर कृषी उत्त्पन्न बाजार समितीमध्ये दररोज शेकडो गाडी कांदा येतो. रात्री हा कांदा उतरवल्यानंतरचं सकाळी 10 वाजता या कांद्याचे लिलाव पार पडतात. मात्र माथाडी कामगार आंदोलनाच्या भूमिकेवर असून कांदा अद्याप उतरवलेला नाही. या सर्व घटनेनंतर सोलापूर कृषी उत्पन्न बाजार समितीमध्ये माथाडी कामगारांनी पुकारलेल्या बंदनंतर प्रशासन आणि कामगरमध्ये बैठक पार पडली. या बैठकीनंतर देखील माथाडी कामागर आज दिवसभर काम करणार नसल्याच्या भूमिकेवर ठाम असल्याने आज सोलापुरात कांद्याचे लिलाव होणार नाही. माथाडी कामगार काम करणार नसल्याने आज दिवसभरात कांद्याचे लिलाव होणार नाहीत. मात्र शेतकऱ्यांनी बाजारात आणलेला कांदा संध्याकाळनंतर उतरवून घेतला जाईल असं सांगण्यात आलं आहे. या कांद्याचे लिलाव उद्या सकाळी नेहमीप्रमाणे पार पडतील, माथाडी कामगार आणि बाजार समिती प्रशासनमध्ये पार पडलेल्या बैठकीनंतर ही माहिती देण्यात आली आहे.