सोलापूर जिल्ह्यात मागील काही दिवसांपासून सुरु असलेल्या मुसळधार पावसामुळे भोगावती नदी दुथडी भरून वाहू लागली आहे. गेल्या अनेक महिन्यांपासून कोरडी पडलेली ही नदी आता पहिल्यांदाच मे महिन्यात तुडुंब भरून वाहताना दिसत आहे.

मान्सूनपूर्व पावसामुळे नदीच्या पाण्यात झालेली वाढ ही संपूर्ण जिल्ह्यासाठी आशादायक असली तरी, नदीकाठच्या गावांसाठी ही स्थिती चिंतेची बनली आहे. विशेषतः वाळूज, मनगोली, तडवळे, ढोराळे, यावली, इर्लेवाडी, इरले, साकत या गावांतील नागरिकांनी सतर्कता बाळगणे आवश्यक आहे.

गेल्या 40 वर्षांतील नोंदी पाहता, मे महिन्यात भोगावती नदी अशा प्रकारे दुथडी भरून वाहत असल्याचे हे दुर्मीळ दृश्य आहे. पावसाचा जोर असाच कायम राहिल्यास नदीच्या पुराचा संभाव्य धोका लक्षात घेता स्थानिक प्रशासन व आपत्ती व्यवस्थापन यंत्रणेला सज्ज राहण्याचे निर्देश देण्यात आले आहेत.