पालघर येथे मुंबई-अहमदाबाद महामार्गावर एक मोठा अपघात झाला. चांदीच्या विटांनी भरलेली एक व्हॅन उड्डाणपुलावर उलटली. या अपघातामुळे काहीवेळ मोठी खळबळ उडाली होती. या व्हॅनमध्ये अंदाजे 600 किलोची चांदी होती, ज्याची किंमत अंदाजे 17 कोटी इतकी आहे. ही घटना पालघर जिल्ह्यातील चारोती उड्डाणपुलावर घडली. पोलिसांनी दिलेल्या माहितीनुसार, मुंबईहून गुजरातकडे जाणारी व्हॅन उड्डाणपुलावर उलटली. अपघातानंतर महामार्गावरील वाहतूक काही काळासाठी थांबवण्यात आली होती. स्थानिकांनी तात्काळ पोलिसांना माहिती दिली. व्हॅनमधला चांदीचा माल एका व्यापाऱ्याचा होता. ही चांदी मुंबईतील नकोडा बुलियन कंपनीकडून गुजरातच्या वापी जीआयडीसीमधील एका कंपनीकडे नेली जात होती. आतमध्ये सुरक्षितपणे पॅक केलेली चांदी, व्हॅन उलटल्यानंतरही सुरक्षित राहिली. मात्र, चांदीचे प्रमाण जास्त असल्यामुळे घटनास्थळी सुरक्षा वाढवण्यात आली.