इंडोनेशियामधून एक अंगावर काटा आणणारा व्हिडिओ समोर आला आहे. या व्हिडिओमध्ये काही लहान मुले जगातील सर्वात मोठ्या अजगराच्या पाठीवर घसरगुंडीसारखे खेळत असल्याचे दिसत आहेत. व्हिडिओमध्ये मुलं अजगरावर चढाओढ करताना आणि त्याच्या अंगावरून खाली घसरत असल्याचा थरारक प्रकार पाहायला मिळत आहे.

हा अत्यंत धोकादायक प्रकार कॅमेऱ्यात कैद झाल्यानंतर सोशल मीडियावर मोठी खळबळ उडाली आहे. लहान मुलांच्या या बेजबाबदार आणि जीवघेण्या कृत्यामुळे नेटकऱ्यांनी तीव्र चिंता व्यक्त केली आहे. अजगरासारखा हिंस्र आणि महाकाय साप कधीही हल्ला करू शकत असताना, मुलांचा हा खेळ त्यांच्या जिवावर बेतू शकला असता, असे युजर्सचे म्हणणे आहे. दरम्यान, या व्हायरल झालेल्या व्हिडिओची कोणतीही अधिकृत पुष्टी झालेली नाही. हा व्हिडिओ खरा आहे की एआय (AI) द्वारे तयार केला गेलाय, याबाबत अद्याप कोणतीही अधिकृत माहिती समोर आलेली नाही. तरीही या व्हिडिओने पालकांमध्ये मोठी भीती निर्माण केली असून, मुलांच्या सुरक्षेचा प्रश्न पुन्हा एकदा ऐरणीवर आला आहे.