काल संघाचे वरिष्ठ नेते भैय्याजी जोशी यांनी मराठीबाबत केलेल्या वक्तव्यामुळे महाराष्ट्रात राजकीय वातावरण चांगलेच तापले आहे. या वक्तव्यावर मनसेप्रमुख राज ठाकरे आणि शिवसेना (ठाकरे गट) प्रमुख उद्धव ठाकरे यांनी तीव्र प्रतिक्रिया व्यक्त केली आहे.

राज्यात मराठी आणि अमराठी हा वाद नवीन नाही. या पार्श्वभूमीवर, ठाकरे गटाने नवीन मागणी पुढे केली आहे. यापूर्वी दुकानांच्या पाट्यांबाबत मराठीत लिहिण्याची अट करण्यात आली होती, त्याच धर्तीवर आता मुंबईतील सर्व हॉटेल्सच्या मेनू कार्डावरही मराठी अनिवार्य करावी, अशी मागणी शिवसेना (ठाकरे गट)ने केली आहे.

यासाठी पक्षाने जिल्हाधिकाऱ्यांना पत्र लिहून, इतर राज्यांप्रमाणे महाराष्ट्रातही स्थानिक भाषेला प्राधान्य द्यावे, अशी मागणी केली आहे. आता हॉटेल व्यवसायिक या मागणीला कसा प्रतिसाद देतात, याकडे सगळ्यांचे लक्ष लागले आहे.