सिंधुदुर्गातील मालवण येथील राजकोट किल्ल्यावर मोठा राडा झाला. शिवसेना ठाकरे गट आणि नारायण राणे यांचे कार्यकर्ते आमने-सामने आले. यावेळी दोन्ही बाजूंनी घोषणाबाजी करण्यात आली. वाद इतका वाढला की, दोन्ही गटातील कार्यकर्त्यांनी एकमेकांना लाथा-बुक्क्यांनी तुफान मारहाण केली. यामुळे परिसरात तणावाचे वातावरण निर्माण झालंय.

सध्या पोलीस दोन्ही गटातील वाद सोडवण्याचा प्रयत्न करीत आहेत. राजकोट किल्ल्यावरील छत्रपती शिवाजी महाराज यांचा पुतळा कोसळल्याप्रकरणी आज मालवण बंदची हाक देण्यात आली होती. या बंदला परिसरातील नागरिकांसह व्यापाऱ्यांनी मोठा पाठिंबा दिला.

यावेळी शिवसेना ठाकरे गटाचे नेते आदित्य ठाकरे आमदार वैभव नाईक हे राजकोट किल्ल्यावर दाखल झाले. त्याचवेळी निलेश राणे यांच्यासह त्यांचे समर्थक देखील किल्ल्यावर आले. यावेळी राणे समर्थकांनी आदित्य ठाकरेंविरोधात जोरदार घोषणाबाजी सुरू केली होती.

त्यामुळे दोन्ही गट आमने-सामने आले. वाद इतका विकोपाला गेला, की दोन्ही गटातील कार्यकर्त्यांनी एकमेकांना मारहाण केली. यात महिला कार्यकर्त्यांचा देखील समावेश होता.