रायगड: आजचा दिवस शिवभक्तांसाठी अत्यंत खास होता. आज अखंड देशाचे आराध्य दैवत छत्रपती शिवाजी महाराजांचा राज्याभिषेक दिन होता. शिवरायांचा राज्याभिषेक सोहळा 6 जून 1674 रोजी पार पडला होता. शिवराज्याभिषेक दिनानिमित्त आज किल्ले रायगडावर शिवराज्याभिषेक सोहळा साजरा झाला. यावेळी राज्यभरातून शिवप्रेमी हे रायगडावर दाखल झाले होते. शिवराज्याभिषेक दिनानिमित्त किल्ले रायगडावर जवळपास 3-4 लाख शिवभक्त दाखल झाले होते.

यावेळी शिवभक्तांचा उत्साह हा शिगेला पोहोचला होता. तसेच अखिल भारतीय शिवराज्याभिषेक दिनोत्सव समितीच्या वतीने आज किल्ले रायगडावर तारखेनुसार शिवराज्याभिषेक दिन सोहळा साजरा करण्यात आला. युवराज छत्रपती संभाजी राजे यांचा हस्ते शिवप्रतिमेचे विधीवत पुजन या वेळी करण्यात आले. उत्सव मूर्ती आणि त्या नंतर मेघडंबरीतील शिव प्रतिमेला पुष्पहार अर्पण करून नाण्यांचा अभिषेक करण्यात आला. राजपुरोहितांचे मंत्रघोष आणि शाहिरीच्या साथीने हा सोहळा पार पडला. यावेळी रायगड पोलिस दलाच्यावतीने छत्रपती शिवाजी महाराजांना सलामी देण्यात आली.