गुरुपौर्णिमेनिमित्त शेगाव, शिर्डी, अक्कलकोटमध्ये भाविकांची अलोट गर्दी झाली आहे. शिर्डीच्या साईबाबा मंदिरात भाविकांची प्रचंड गर्दी उसळली आहे. देशभरातून लाखो साईभक्त शिर्डीकडे येऊन साईबाबांच्या चरणी माथा टेकत आहेत. साईदर्शनासाठी पहाटेपासूनच रांगा लागल्याचं चित्र शिर्डी परिसरात पाहायला मिळत आहे.भाविकांसाठी विशेष व्यवस्था करण्यात आली असून पोलिसांचा मोठा बंदोबस्तही तैनात आहे.

मंदिरात गुरुपौर्णिमेनिमित्त विशेष पूजन व आरती आयोजित करण्यात आली असून, संपूर्ण मंदिर परिसर फुलांनी सजवण्यात आला आहे. रोषणाई, पताका, आणि पारंपरिक सजावटीमुळे संपूर्ण शिर्डी भक्तिमय वातावरणात न्हालेली दिसत आहे.

शिर्डीत आज संपूर्ण दिवस साईनामाच्या जयघोषात भक्तिरसात न्हालेला आहे. विविध राज्यांमधून आलेल्या भक्तांनी 'साईराम' चा गजर करत मंदिर परिसर गजरमय केला आहे. गुरुपौर्णिमेच्या निमित्ताने साईबाबांच्या चरणी लीन झालेली शिर्डी, भक्तीच्या तेजात न्हालेली आहे.