विकास मिरगणे, नवी मुंबई, साम टीव्ही

नवी मुंबईतील ऐरोली येथील माजी नगरसेवक आणि शिंदे गटाचे उमेदवार एम के मढवी, माजी नगरसेविका विनया मढवी आणि करण मढवी यांनी ऐरोली सेक्टर १६ येथील एका मंडळाच्या ठिकाणी जाऊन त्या मंडळातील युवकांना मारहाण केल्याचा आरोप होत आहे. मारहाण करतानाचा सीसीटीव्ही व्हिडिओ समोर आला आहे. ऐरोलीतील एका मंडळाच्या मुलांना शिवीगाळ आणि धमकी देऊन त्यांना मारहाण करतानाचे सीसीटीव्ही फुटेज समोर आले आहे. याबाबत पीडित तरुणांनी पोलिसांत तक्रार केली. रबाळे पोलीस ठाण्याचे वरिष्ठ पोलीस निरीक्षक आणि अधिकारी घटनेबाबत विचारणा करण्यासाठी गेले असता, मढवी कुटुंबीयांनी त्यांच्याशीही हुज्जत घातली, असे पोलिसांचे म्हणणे आहे. रबाळे पोलिसांनी तिघांनाही ताब्यात घेतलंय.

घणसोलीत भाजप-शिवसेना कार्यकर्त्यांमध्ये हाणामारी

नवी मुंबई महानगरपालिका निवडणुकीसाठी मतदानाला काही तास उरले असतानाच, राजकीय वातावरण तापलं आहे. मध्यरात्री अडीच वाजताच्या सुमारास भाजप आणि शिंदे सेनेच्या कार्यकर्त्यांमध्ये हाणामारी झाल्याची घटना घडलीय. त्यावेळी तिथं असलेल्या पोलिसांनी वेळीच हस्तक्षेप करून दोन्ही गटाच्या कार्यकर्त्यांना शांत करण्याचा प्रयत्न केला. या घटनेचा सीसीटीव्ही व्हिडिओही समोर आला आहे.