डोंबिवलीतील कुंभारखान पाडा परिसरात गणेश घाट आणि रागाई मंदिराच्या प्रवेशद्वाराच्या उद्घाटनावेळी राजकीय वातावरण चांगलेच तापले. विवाद टाळण्यासाठी पोलिसांनी शिवसेना (शिंदे गट) चे नगरसेवक विकास म्हात्रे यांना त्यांच्या घरीच नजरकैदेत ठेवले होते. भाजप प्रदेशाध्यक्ष रवींद्र चव्हाण यांच्या उपस्थितीत हे उद्घाटन होणार असल्याने संभाव्य वादाच्या पार्श्वभूमीवर पोलिसांनी ही खबरदारी घेतल्याची माहिती समोर आली आहे.

नजरकैद असूनही विकास म्हात्रे यांचे समर्थक मोठ्या संख्येने उद्घाटनस्थळी पोहोचले. यानंतर भाजप आणि शिंदे गटाच्या कार्यकर्त्यांमध्ये आमनेसामने परिस्थिती निर्माण झाली. दोन्ही गटांकडून जोरदार घोषणाबाजी सुरू होताच काही काळ तणावपूर्ण वातावरण निर्माण झाले होते.

घटनास्थळी पोलीस बंदोबस्त वाढवण्यात आला असून परिस्थिती नियंत्रणात आणण्यात पोलिसांना यश आले. पुढील काही तास परिसरात कडक सुरक्षा तैनात करण्यात आली आहे.