Shaktipeeth Expressway Latest News : रक्त सांडू पण शक्तीपीठ महामार्ग होऊ देणार नाही, असा आक्रमक पवित्रा घेत कोल्हापुरात हजारो शेतकरी रस्त्यावर उतरलेत. शक्तीपीठ महामार्ग रद्द करण्याच्या मागणीसाठी कोल्हापूर जिल्हाधिकारी कार्यालयावर महामोर्चा काढण्यात आला. दसरा चौकात पश्चिम महाराष्ट्रातील शेतकऱ्यांनी शक्तिपीठ महामार्गाविरोधात जोरदार आंदोलन केलं. काँग्रेस नेते सतेज पाटील यांच्या नेतृत्वाखाली आंदोलकांनी सरकारविरोधात तीव्र रणशिंग फुकलं.

शक्तिपीठ महामार्ग रद्द करावा या प्रमुख मागणीसाठी आज कोल्हापुरात महामोर्चाच आयोजन करण्यात आलं आहे. कोल्हापुरातील दसरा चौक ते जिल्हाधिकारी कार्यालयावर हा महामोर्चा काढण्यात येत आहे. मोर्चाच्या पार्श्वभूमीवर कोल्हापूर जिल्ह्यातील शेतकऱ्यांसह पश्चिम महाराष्ट्रातल्या शेतकरी या मोर्चात सहभागी होण्यासाठी जमा झाले. या मोर्चात महिला शेतकरी देखील उपस्थित आहेत. सकाळी या मोर्चाला सुरुवात झाली असून या मोर्चाचे नेतृत्व खासदार शाहू महाराज छत्रपती, आमदार सतेज पाटील यांच्यासह महाविकास आघाडीतील इतर नेत्यांनी केले.