कल्याणकरांसाठी आणि शहाड पुलावरून प्रवास करणाऱ्यांसाठी महत्वाची बातमी आहे. कल्याण- नगर मार्गावरील शहाड पुलाची दुरावस्था झाली आहे. या पुलावर पावलोपावली खड्डे पडले आहेत. विविध राजकीय पक्षांनी संघटनांनी या खड्ड्यांविरोधात आंदोलन करत देखभाल दुरुस्तीची मागणी केली होती. अखेर राष्ट्रीय महामार्ग विभागाने या पुलाची देखभाल दुरुस्तीचे काम हाती घेतले आहे. रविवारी रात्री बारा वाजल्यापासून ते १५ ऑक्टोबरपर्यंत शहाड पूल देखभाल दुरुस्तीसाठी अवजड वाहनांसाठी बंद ठेवण्यात आला आहे. एकंदरीतच या पुलावर मोठ्या प्रमाणात वाहनांची वर्दळ असते. त्यामुळे वाहन चालकांची गैरसोय होऊ नये यासाठी वाहतूक विभागाने पर्यायी मार्ग सुचवले आहेत. याच पर्याय मार्गावरून वाहतूक करावी असे आवाहन वाहतूक पोलिसांनी केलं आहे.