रणजित माजगांवकर, कोल्हापूर

करवीर निवासिनी श्री अंबाबाई मंदिर आणि दख्खनचा राजा श्रीक्षेत्र ज्योतिबा मंदिरात दर्शनासाठी येणाऱ्या भाविकांनी भारतीय परंपरेला शोभेल अशा पद्धतीची वस्त्र धारण करूनच यावीत, असे पत्र पश्चिम महाराष्ट्र देवस्थान समितीने जाहीर केले आहे. करवीर निवासिनी श्री अंबाबाई मंदिरात यापूर्वीच ड्रेस कोड संदर्भात निर्णय घेण्यात आला होता. मात्र त्याची कडक अंमलबजावणी करण्यात आली नव्हती. गेली अनेक महिने भाविक दख्खनचा राजा श्रीक्षेत्र ज्योतिबा मंदिर आणि कोल्हापुरातील करवीर निवासिनी श्री अंबाबाई मंदिरात अनेक भाविक पाश्चात्य संस्कृतीचे ड्रेस तसेच तोकडे कपडे घालून येत असल्याचे निदर्शनास येत आहेत. त्या पार्श्वभूमीवर देवस्थान समितीने भाविकांसाठी नियमावली जाहीर केलेली आहे. तसेच मंदिरात येत असताना पुरुषांनी पूर्ण कपडे तसेच महिलांनी साडी किंवा चुडीदार अशा पद्धतीच्या वस्त्रांचा वापर करावा असे म्हटले आहे.

दरम्यान मंदिर परिसरात तोकडे कपडे घालावे की पूर्ण भारतीय पोशाख परिधान करून मंदिरात यावे ? यासंदर्भात साम टीव्हीच्या वतीने काही भाविकांना प्रश्न विचारण्यात आलेत. यावेळी भाविकांनी मंदिरात येत असताना भारतीय संस्कृतीला शोभतील असेच कपडे परिधान केले पाहिजे अशा पद्धतीच्या प्रतिक्रिया साम टीव्ही सोबत बोलताना दिलेल्या आहेत. आपण मंदिरात देवदर्शनासाठी येत असतो, पिकनिकला येत नसतो. इतर राज्यातील मंदिरात जाताना आपण संस्कृतीला शोभतील असेच कपडे घालतो, मग आपल्या मंदिरांमध्ये सुद्धा आपण याचं भान ठेवूनच प्रत्येकाने मंदिरात येताना ही आचारसंहिता पाळणे गरजेचे असल्याचेही भाविकांनी सांगितलं आहे.

कोल्हापुरातील करवीर निवासिनी श्री अंबाबाई मंदिरात आणि दख्खनचा राजा श्रीक्षेत्र जोतिबा मंदिरात दर्शनासाठी येताना भाविकांनी अनावधानाने जर तोकडे कपडे घातले असतील, तर त्यांना मंदिर परिसरात असणाऱ्या दुकानांमध्ये सोहळे वापरण्यासाठी मिळणार आहे. नाम मात्र दरामध्ये भाविकांनी ते सोहळे नेसून मगच मंदिरात प्रवेश करावा असं पश्चिम महाराष्ट्र देवस्थान समितीने सांगितले आहे. पश्चिम महाराष्ट्र देवस्थान समितीने ड्रेस कोड संदर्भात केलेल्या नियमावलीला आता महाराष्ट्रातील भाविक कसा प्रतिसाद देतात हे काही दिवसातच स्पष्ट होईल.