योगेश काशिद, बीड

sarpanch santosh deshmukh killing Case : बीडच्या मस्साजोगचे सरपंच संतोष देशमुख हत्या प्रकरणातील तिन्ही वेगवेगळ्या गुन्ह्यांतील दोषारोपपत्र न्यायालयात दाखल करण्यात आले आहेत.

बीड जिल्ह्यातील मस्साजोगचे सरपंच संतोष देशमुख हत्या प्रकरणात महत्वाची अपडेट समोर आली आहे. सीआयडी आणि एसआयटीनं संयुक्तपणे या प्रकरणात दाखल तिन्ही वेगवेगळ्या गुन्ह्यात दोषारोपपत्र दाखल केले आहेत. संतोष देशमुख हत्या प्रकरण, खंडणी आणि ॲट्रॉसिटी प्रकरणी तीन वेगवेगळे गुन्हे नोंदवण्यात आले असून, दोषारोपपत्र बीड न्यायालयात दाखल करण्यात आले आहेत.

या दोषारोपपत्रात संतोष देशमुख यांच्या कुटुंबातील सदस्यांचे जबाब देखील नोंदवण्यात आलेले आहेत. महत्त्वाचे म्हणजे धनंजय देशमुख, अश्विनी देशमुख यांचे जबाब नोंदविण्यात आले आहेत. जवळपास १४०० पानांचे हे दोषारोपपत्र आहे.

८० दिवसांत दोषारोपपत्र

संतोष देशमुख यांची हत्या, खंडणी व ॲट्रॉसिटी प्रकरणातील दोषारोपपत्र न्यायालयात दाखल करण्यात आले. याबद्दल आमदार सुरेश धस यांनी गृहमंत्र्यांचे आभार मानले. घटना घडल्यानंतर ८० दिवसांत हे आरोपपत्र दाखल झाले आहे. त्यामुळे आरोपींना यात जामीन सुद्धा मागता येणार नाही. हे अतिशय चांगले काम झाले असून, याबद्दल मी गृहमंत्र्यांचे आभार मानतो, असे सुरेश धस म्हणाले.