संतश्रेष्ठ ज्ञानेश्वर महाराजांची पालखी आज महाराष्ट्राचे कुलदैवत असलेल्या खंडोबाच्या सोन्याच्या जेजुरी नगरीत मोठ्या भक्तिभावात दाखल होणार आहे. आज पहाटेपासूनच लाखो वारकरी खंडोबाच्या दर्शनासाठी गडावर जमले आहेत. शैव आणि वैष्णव परंपरेचा अनोखा संगम आज जेजुरीत खंडोबा गडावर पाहायला मिळत आहे.

ड्रोन कॅमेऱ्याच्या माध्यमातून खंडोबा गडाची भक्तिमय दृश्यं कैद होत असून, गडावरील रंगांची उधळण, गुलालाची उधळपट्टी, टाळ-मृदुंगाचा गजर, हरिपाठ, अभंग आणि फडांचे थरार अंगावर रोमांच आणत आहेत.वारकरी भजनात, अभंगगायनात तल्लीन झाले असून संत ज्ञानेश्वर महाराजांची पालखी यात्रा पुढं चालली आहे असा जयघोष करत भक्तीमय वातावरणात सोन्याच्या जेजुरीत पोहोचत आहे.

वारी परंपरेतील हा क्षण म्हणजे श्रद्धेचा, भक्तीचा आणि महाराष्ट्राच्या अध्यात्मिक संस्कृतीचा एक सुवर्ण अध्याय आहे. संपूर्ण परिसरात कडेकोट पोलीस बंदोबस्त असून, भाविकांच्या सुरक्षिततेसाठी प्रशासन सज्ज आहे.