सांगली शहरासह परिसरात मान्सूनपूर्व पावसाने सायंकाळी दमदार हजेरी लावली. त्यामुळे नागरिकांना उकाड्यापासून दिलासा दिला. तर सायंकाळी झालेल्या मुसळधार पावसामुळे शहरातील स्टेशन चौक रोड, शिवाजी मंडई परिसरातील मुख्य रस्त्यावर पाणी आले होते. अनेक ठिकाणी पाणी रस्त्यावर साचून सुद्धा राहिले आहे. त्यामुळे वाहन चालकांना मोठी कसरत करून मार्ग काढावा लागत आहे. अनेक भागांतील जनजीवन काही काळ विस्कळीत झाले. मात्र या पावसामुळे सांगलीकरांची मोठी दैना उडाली आहे.

नाशिकच्या मनमाडमध्येही जोरदार पाऊस

नाशिकच्या मनमाड आणि परिसरात सलग दुसऱ्या दिवशी विजांच्या कडकडाट,वादळी वाऱ्यासह जोरदार पावसाने हजेरी लावली आहे. कालच्या पावसानंतर आज तापमानात वाढ झाल्याने मोठ्या प्रमाणात उष्णता वाढून उकाडा वाढला. पावसामुळे वातावरणात गारवा निर्माण झाला आहे. अचानक पावसाने पुन्हा हजेरी लावल्याने रविवारच्या आठवडे बाजारात ग्रामीण भागातून आलेल्या नागरिकांचे हाल झाले. तर काल पेक्षा आज मात्र विजांचा गडगडाट अधिक होता. त्यामुळे नेहमी प्रमाणे वीज पुरवठा खंडित झाला आहे.