मनोज जरांगे यांनी कायम समाजाच्या हिताचा निर्णय घेतला आहे. सर्व बाजूंनी विचार करूनच ते आपली भूमिका स्पष्ट करत असतात, अशी प्रतिक्रिया संभाजीराजे छत्रपती यांनी दिली आहे. मनोज जरांगे यांनी विधानसभा निवडणुकीतून माघार घेतल्याने त्याबद्दल बोलताना संभाजीराजे यांनी ही प्रतिक्रिया दिली आहे. जरांगे यांच्या भूमिकेबद्दल खासदार संजय राऊत यांनी देखील आपली प्रतिक्रिया नोंदवली आहे.

मराठा आंदोलक मनोज जरांगे पाटील यांनी विधानसभा निवडणुकीच्या मैदानातून माघार घेतल्यानंतर आता त्यांच्या या भूमिकेवर राजकीय वर्तुळातून वेगवेगळ्या प्रतिक्रिया येत आहेत. 'सर्व बाजूंनी विचार करूनच मनोज जरांगे आपली भूमिका स्पष्ट करतात. त्यांनी आजवर कायम समाजाच्या हिताचे निर्णय घेतले आहेत. विधानसभा निवडणुकीतून माघार घेताना देखील त्यांनी निश्चितच पूर्ण विचार करूनच आपली भूमिका स्पष्ट केली असेल. त्यांच्याशी बोलल्याशिवाय याबद्दल मला प्रतिक्रिया देता येणार नाही', असं संभाजीराजे छत्रपती यांनी म्हंटलं आहे. तर शिवसेना उद्धव ठाकरे गटाचे खासदार संजय राऊत यांनी देखील याबद्दल आपली प्रतिक्रिया दिली आहे. 'मनोज जरांगे यांचा संघर्ष सातत्याने सुरू आहे. हा संघर्ष त्यांच्या समाजाच्या विकासासाठी व उद्धारासाठी आहे. त्यासाठी त्यांनी आपल्या प्राणांची बाजी लावली हे मान्य केले पाहिजे. समाज त्यांच्या पाठिशी एकसंधपणे उभा आहे हे ही आपण मान्य केले पाहिजे. निवडणुकीविषयी काय निर्णय घ्यावा हा त्यांचा निर्णय आहे. आम्ही स्वतः त्यांचा लढा राजकीय मानत नाही. हा सामाजिक लढा आहे. ही एक सामाजिक चळवळ आहे. त्यामुळे जरांगे यांनी कोणती भूमिका घ्यावी व कशा प्रकारे घ्यावी याचे मार्गदर्शन आम्ही करणार नाही. पण त्यांच्या लढ्याला आमचे कायम पाठबळ असेल,' असं राऊत यांनी याविषयी भाष्य करताना म्हंटलं आहे.

Edited By Rakhi Rajput