मस्साजोगचे माजी सरपंच संतोष देशमुख यांच्या हत्या प्रकरणावरून माजी खासदार संभाजी राजे यांनी मंत्री धनंजय मुंडे यांच्यावर हल्ला केला आहे. वाल्मिक कराडला अद्याप अटक का केली नाही? असा संतप्त सवाल संभाजी राजे छत्रपतींनी उपस्थित केला आहे. धनंजय मुंडे यांना मंत्रिपदावर राहाण्याचा अधिकार नाही असंही संभाजी राजे यांनी म्हटलं आहे.

बीड जिल्ह्यातील मस्साजोग येथील माजी सरपंच संतोष देशमुख यांची पंधरा दिवसांपूर्वी हत्या करण्यात आली होती. या घटनेमुळे राज्यातील प्रत्येक भागातून संतत्प प्रतिक्रिया व्यक्त होत आहे. मारेकऱ्यांना अटक करण्याची मागणी देशमुख यांच्या कुटुंबासह गावकऱ्यांनी केली आहे. या प्रकरणात धनंजय मुंडे यांचे विश्वासू वाल्मिक कराड यांचं देखील नाव समोर आलं आहे. त्यामुळे राजकीय वर्तुळात विरोधकांकडून आरोपप्रत्यारोप सुरू आहेत. आज बीड जिल्ह्यात या प्रकरणी प्रशासनाच्या विरोधात सर्व पक्षीय निषेध मोर्चा काढण्यात येत आहे. तत्पूर्वी माजी खासदार संभाजी राजे छत्रपती यांनी धनंजय मुंडे यांच्यावर हल्लाबोल केला आहे. अद्याप वाल्मिक कराडला अटक का झाली नाही? असा संतप्त सवाल विचारात वाल्मिक कराड यांच्याशिवाय धनंजय मुंडे यांचं पान हलत नाही हे स्वत: पंकजा मुंडे यांनी भर सभेत सांगितलं आहे. मग धनंजय मुंडे यांना मंत्रिपदावर राहाण्याचा अधिकार नसल्याचा घणाघात संभाजी राजे यांनी केला आहे.