दहीहंडी उत्सवाच्या कार्यक्रमात बायका नाचवणारे हे देशद्रोही आहेत, अशी संतप्त प्रतिक्रिया संभाजी भिडे यांनी दिली. प्रसारमाध्यमांशी बोलताना त्यांनी ही प्रतिक्रिया दिली आहे. दहीहंडी उत्सवाच्या आयोजकांकडून काही ठिकाणी नृत्यांगणांचे कार्यक्रम ठेवण्यात आले होते. काही ठिकाणी अश्लिल नृत्य आणि शेरेबाजीही करण्यात आल्याचे दिसून आले. त्याचे बरेचसे व्हिडिओही सोशल मीडियावर व्हायरल होत आहेत. यावरून नेटकऱ्यांनी अनेक प्रश्न उपस्थित केले होते. दहीहंडीसारख्या उत्सवात नृत्यांगणांना नाचवणे योग्य आहे का, असा सवालही नेटकऱ्यांकडून करण्यात आला होता. याच मुद्द्यावर संभाजी भिडे यांना प्रसारमाध्यमांच्या प्रतिनिधींकडून प्रश्न विचारण्यात आला. त्यावर दहीहंडीच्या सणाच्या कार्यक्रमात बायका नाचवणारे हे देशद्रोहीच आहेत, असे ते म्हणाले.

हा मूर्खपणा असून, असले प्रकार करणारे देशद्रोही आहेत, असे संभाजी भिडे म्हणाले. सध्याच्या डीजे, डॉल्बीच्या मुद्द्यावरही त्यांनी भाष्य केले. संबंध देशाने डॉल्बी आणि डीजे फेकून दिले पाहिजेत. ते कायमस्वरुपी बंद झाले पाहिजेत. सण-उत्सवांमध्ये त्याचा उपयोग काय, असा सवालही त्यांनी उपस्थित केला.