भंडाऱ्याच्या साकोली शहरातील जुन्या भागात असलेला मुख्य तलाव फुटला आहे. मागील काही दिवसांपासून सुरु असलेल्या मुसळधार पावसामुळे तलाव तुडुंब भरला होता. साकोलीचे माजी नगरसेवक मनीष कापगते यांनी यापूर्वीच तलाव फुटण्याची शक्यता व्यक्त केली होती. मात्र, प्रशासनाने त्याकडे दुर्लक्ष केल्याचा आरोप आता होत आहे.तलाव फुटल्यानंतर मोठ्या प्रमाणात पाणी परिसरातील शेतशिवारात शिरलं असून सगळी शेती खरडून निघाली आहे.सध्या संपूर्ण परिसर जलमय झाला आहे. परिणामी नागरिकांमध्ये भीतीचे वातावरण आहे. या घटनेमुळे साकोली ते चंद्रपूर मार्गावर वाहतूक पूर्णपणे ठप्प होण्याची शक्यता निर्माण झाली आहे. तातडीने मदतकार्य सुरू करावं, अशी मागणी नागरिकांकडून केली जात आहे.