अभिनेता सैफ अली खान याच्यावर झालेल्या चाकू हल्ल्यानंतर आता आज लीलावती येथे त्याच्यावर उपचार करणाऱ्या डॉक्टरांनी पत्रकार परिषद घेऊन त्याच्या तब्बेतीबद्दल माहिती दिली आहे. यावेळी डॉक्टरांनी सैफ रुग्णालयात दाखल झाला तेव्हाचा थरारक अनुभव सांगितला. सैफच्या पाठीच्या कण्यामध्ये चाकूचा तुकडा अडकला होता. डॉक्टरांनी शस्त्रक्रियेनंतर चाकूचा अडीच इंचाचा तुकडा काढला आहे. त्याची छायाचित्रेही समोर आली आहेत.

यावेळी बोलताना डॉक्टर म्हणाले की, सैफ जेव्हा रुग्णालयात आला तेव्हा तो रक्ताने माखलेला होता. त्याच्यासोबत मुलगा तैमूर होता. एवढं लागलेलं असतानाही सैफ सिंहासारखा चालत होता. एखाद्या चित्रपटासारखं ते दृश्य होतं. सैफ आता पूर्णपणे बरा आहे. त्याला आयसीयूमधून स्पेशल वॉर्डमध्ये शिफ्ट केले आहे. सैफला चालण्यात कोणतीही अडचण येत नाही आणि तो नशीबवान आहे त्याने स्ट्रेचरही मागितले नाही.

दरम्यान, डॉक्टरांनी सैफला एक आठवडा विश्रांती घेण्यास सांगितले आहे. डॉक्टरांनी असेही सांगितले की अभिनेत्याला आठवडाभर बेड विश्रांती घेणे आवश्यक आहे आणि त्याच्या प्रकृतीवर लक्ष ठेवले जात आहे. त्याला 2 ते 3 दिवसांत रुग्णालयातून डिस्चार्ज मिळेल.