Saif Ali Khan Attack Inside Story : अभिनेता सैफ अली खानवर काल मध्यरात्री चाकूने हल्ला झाला. या हल्ल्यात सैफच्या मानेवर, हातावर आणि पाठीवर वार झाले. एकूण सहा जखमांपैकी दोन जखमा या गंभीर असल्याची माहिती समोर आली होती. हल्ला झाल्यानंतर सैफला उपचारांसाठी लीलावती रुग्णालयात नेण्यात आले. त्याच्यावर शस्त्रक्रिया झाल्या. आता त्याची प्रकृती स्थिर असल्याची माहिती डॉक्टरांनी दिली. हल्ला करणारी व्यक्ती चोर असून चोरीच्या उद्देशाने तो चोर सैफच्या घरी घुसला होता अशी प्राथमिक माहिती पोलिसांनी दिली आहे. या चोराची ओळख पटली असून तो दादर परिसरात असल्याचे समोर आले आहे. त्याला पकडण्यासाठी पोलिसांच्या १० टीम रवाना झाल्या आहेत. चोर सैफच्या इमारतीच्या बाजूला असलेल्या एका भिंतीवर चढला आणि त्याने इमारतीमध्ये प्रवेश केला.