माझ्या सारख्या कार्यकर्त्यावर अन्याय करू नका, अशा शब्दात विद्यमान आमदार सदा सरवणकर यांनी ट्विट करून राज ठाकरे यांना विनंती केली आहे. बाळासाहेबांनी देखील नातेवाईकांना सीट सोडायला सांगितलं नसतं असं देखील त्यांनी म्हंटलं आहे. मला समर्थन द्या अशीही विनंती सरवणकर यांनी राज ठाकरे यांना केली आहे. यासंदर्भात त्यांनी ट्विटरवरून एक पोस्ट केली आहे.

मुंबईतील माहीम विधानसभा मतदारसंघाकडे साऱ्यांचे लक्ष लागलं आहे. या विधानसभा मतदारसंघात तिरंगी लढत पाहायला मिळत आहे. महाविकास आघाडीकडून महेश सावंत, महायुतीकडून सदा सरवणकर आणि मनसेकडून अमित ठाकरे रिंगणात उतरले आहेत. अमित ठाकरे यांनी अर्ज भरल्याने मतदारसंघातील लढाई प्रतिष्ठेची झाली आहे. दादर - माहीम मतदारसंघात राज ठाकरे यांचे पुत्र अमित ठाकरे हे पहिल्यांदा विधानसभा निवडणूक लढवणार आहेत. त्यांच्या विरोधात शिवसेनेचे सदा सरवणकर यांनी उमेदवारी अर्ज भरला आहे. मात्र आज राज ठाकरे आणि देवेंद्र फडणवीस यांच्यात चर्चा झाली होती. त्यांनंतर देवेंद्र फडणवीस यांनी माध्यमांशी संवाद साधत अमित ठाकरे यांना दादर माहीम मतदारसंघात भाजप पाठिंबा देणार असल्याचं सांगितलं आहे. त्यामुळे आता सदा सरवणकर यांनी याबद्दल ट्विट करत राज ठाकरे यांना माझ्या सारख्या कार्यकर्त्यावर अन्याय करू नका, मी चाळीस वर्षापासून शिवसेनेचा कार्यकर्ता आहे. आम्ही आमच्या कष्टाने आणि घामाने तीन वेळा माहिमचा आमदार झालो. बाळासाहेब असते तर त्यांनी मला आपल्या नातेवाईकांसाठी सीट सोडायला सांगितलं नसतं. त्यांचे पन्नास नातेवाईक दादर - माहिम मध्ये राहतात पण उमेदवारी त्यांनी माझ्यासारख्या सामान्य कार्यकर्त्याला दिली. ते कार्यकर्त्याची भावना जपणारे नेते होते. एकनाथ शिंदे साहेबांकडे पाहा त्यांचे सुपुत्र हे तीन वेळचे खासदार असताना सुद्धा त्यांनी आपल्या मुलाला केंद्रात मंत्री बनवले नाही, तर एका निष्ठावंत शिवसैनिकाला ती संधी दिली. राजसाहेबांना मी विनंती करतो माझ्यासारख्या कार्यकर्त्यांवर अन्याय करू नका. मला आपले समर्थन द्या, असं सरवणकर यांनी म्हंटलं आहे.

Edited By Rakhi Rajput