प्रशांत कोरटकर चालवत असलेली आलिशान रोल्स रॉयस ही प्रत्यक्षात पिंपरी-चिंचवडमधील प्रसिद्ध बांधकाम व्यावसायिक तुषार कलाटे यांच्या मालकीची असल्याचे स्पष्ट झाले आहे. ही आलिशान कार मुळशी तालुक्यातील तुषार कलाटे यांच्या फार्महाऊसमध्ये उभी असल्याचे समोर आले असून, WB-02-AB-123 क्रमांकाच्या या कारसोबत तुषार कलाटे यांचे फोटो देखील उपलब्ध आहेत. विशेष म्हणजे प्रशांत कोरटकर आणि तुषार कलाटे यांचा एकत्रित व्हिडिओ देखील समोर आला आहे.या व्हिडिओमध्ये वादग्रस्त तांत्रिक मनोहर भोसले देखील आढळून आला आहे.

मनोहर भोसलेवर आधीपासूनच गंभीर आरोप आहेत. अघोरी विद्येच्या आधारे भक्तांची फसवणूक आणि लैंगिक शोषण केल्याप्रकरणी त्याच्यावर गुन्हे दाखल आहेत. त्यामुळे या प्रकरणाला अधिक गांभीर्याने पाहिले जात आहे.

प्रशांत कोरटकरच्या पोलीस अधिकाऱ्यांसोबत असलेल्या घनिष्ठ संबंधांमुळेच तुषार कलाटेंना ही रोल्स रॉयस मिळाली का? हा मोठा प्रश्न उपस्थित झाला आहे. कारण ही कार चार हजार सातशे कोटी रुपयांच्या घोटाळ्यात अडकलेल्या महेश मोतेवारच्या समृद्ध जीवन कंपनीच्या नावावर आहे.

कोल्हापूर पोलिसांनी प्रशांत कोरटकरला अटक केल्यानंतरही या कारबाबत चौकशी करण्यात आली होती, मात्र त्याने याविषयी माहिती देण्यास स्पष्ट नकार दिला होता.