Ajit Pawar crash probe, Rohit Pawar allegation : अजित पवार यांच्या विमान अपघातावरून आमदार रोहित पवार यांनी पुन्हा एकदा 'घातपाता'चा संशय व्यक्त केला आहे. आज घेतलेल्या पत्रकार परिषदेत त्यांनी काही नवीन पुरावे आणि तांत्रिक मुद्दे मांडत आपला संशय व्यक्त केला. रोहित पवार यांनी स्पष्ट केले की, या प्रकरणातील नवीन माहिती समोर आल्यानंतर हा अपघात नसून घातपात असावा, या दिशेने लोकांचा आणि तज्ज्ञांचा कल वाढू लागला आहे. २७ तारखेला घडलेल्या घडामोडी, कुणीतरी भेटायला येणे आणि आलेले फोन कॉल्स यावरून संशय बळावत असल्याचा दावा त्यांनी केला आहे.

रोहित पवार यांनी विमानातील फ्यूल टँकवर शंका व्यक्त केली. विमानामध्ये इंधनाचे अतिरिक्त कॅन (Fuel Can) ठेवले होते का? अशी शंका त्यांनी पुन्हा केली. त्यांनी आधीच वर्तवलेले भाकीत खरे ठरत असल्याचे सांगताना ते म्हणाले की, आता केंद्र सरकारच्या एजन्सीकडून "ब्लॅक बॉक्समध्ये अडचण असू शकते" किंवा "त्याचा काही भाग जळाला आहे" असे स्पष्टीकरण दिले जात आहे.

व्हीएसआर (VSR) कंपनीच्या विमानाचे मेंटेनन्स आणि इतर तांत्रिक बाबींचे दाखले देत त्यांनी सुरक्षेच्या त्रुटींकडे लक्ष वेधले आहे. या प्रकरणाचा तपास अधिक सखोल व्हावा आणि तज्ज्ञांची मदत घेऊन ब्लॅक बॉक्स विदेशात तपासासाठी पाठवला जाणार असल्याचे समोर आलेय.