शिवसेनेचे प्रमुख नेते आणि उपमुख्यमंत्री एकनाथ शिंदे हे दिल्लीत ठाण मांडून बसले असतानाच, राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी एक खळबळजनक दावा केला आहे. शिंदे यांच्या सर्व मंत्र्यांना प्राप्तिकर विभागाच्या नोटिसा आल्या आहेत, असा दावा रोहित पवार यांनी केला आहे.

राज्याचे उपमुख्यमंत्री एकनाथ शिंदे हे दिल्ली दौऱ्यावर गेले होते. तिथे त्यांनी अमित शहा यांची भेट घेऊन विविध मुद्द्यांवर चर्चा केल्याचे सांगण्यात येत आहे. दुसरीकडे राज्यात सर्व काही आलबेल नसल्याचीही चर्चा आहे. महायुतीत असलेले छुपे मतभेद हे यामागचं कारण असल्याची चर्चाही राजकीय वर्तुळात सुरू आहे. त्यातच आता रोहित पवार यांनी एकनाथ शिंदेंबाबत धक्कादायक आणि राज्याच्या राजकारणात खळबळ उडवून देणारा दावा केला आहे. रोहित पवार यांनी शिंदेंच्या मंत्र्यांवर गंभीर आरोप केले आहेत. शिंदेंच्या सर्व मंत्र्यांना प्राप्तिकर विभागाकडून नोटिसा बजावण्यात आल्या आहेत. शिंदेंच्या कुटुंबातील एका व्यक्तीलाही नोटीस आल्याचा दावा त्यांनी केला आहे. त्यामुळे राज्याच्या राजकारणात वेगवेगळे तर्कवितर्क लढवले जात आहेत.