मुंबई उत्तर पश्चिममधून ठाकरे गटाने अमोल किर्तीकरांना उमेदवारी जाहीर केली. त्यानंतर किर्तीकरांनी प्रचारालाही सुरुवात केली. आता महायुतीमधून रवींद्र वायकर यांना उमेदवारी मिळण्याची शक्यता आहे असे सांगितले जात आहे. 2022 साली एकनाथ शिंदे यांनी बंडखोरी केल्यानंतरही वायकर ठाकरे गटातच राहिले. पण हल्लीच त्यांनी शिंदे गटात जाहीर प्रवेश घेतला. त्यामुळे महायुती वायकर यांना उमेदवारी देण्याची शक्यता वर्तवली जाते. खरंतर वायकर यांच्या नावाला भाजप आमदार अमित साटम आणि मनसेच्या काही नेत्यांनी विरोध केला होता. पण शिंदे गटाने वायकरांच्या नावावर शिक्कामोर्तब केल्याचं सांगितलं जातंय.