बीड: शहरातील पेठ भागातील कापड व्यवसायिक राम फटाले यांनी सावकाराच्या जाचास कंटाळून काही दिवसांपूर्वी राहत्या घरात गळफास लावून आत्महत्या केली होती. या प्रकरणात सात आरोपींच्या विरोधात गुन्हा दाखल करण्यात आला असून तीन आरोपींना 10 जुलै पर्यंतची पोलीस कोठडी देण्यात आलेली आहे. सावकार डॉक्टर लक्ष्मण जाधव आणि मयत राम फटाले यांच्या संभाषणाच्या दोन अतिशय धक्कादायक कॉल रेकॉर्डिंग व्हायरल झाल्या आहेत. या कॉल रेकॉर्डिंगमध्ये सावकार डॉक्टर लक्ष्मण जाधव हा फटाले यांना अरेरावीची भाषा करत शिवीगाळ करत आहे. तू माझ्या हॉस्पिटलमध्ये तुझ्या वडिलांना घेऊन ये तसेच माझी मुद्दल मला दे कधी देतोस ते सांग? तू नाही आलास तर मला तुझ्या घरी पोरं घेऊन यावं लागेल अशा प्रकारे धमकावत आहे.

तर दुसऱ्या कॉल रेकॉर्डिंग मध्ये 2000 रूपये टाकले वरचे चारशे रुपये तुझा बाप टाकणार आहे का ? अशा प्रकारची भाषा सावकार डॉक्टर लक्ष्मण जाधव वापरत असल्याचं या कॉल रेकॉर्डिंग मधून समोर आलं आहे.

तर तुला पैसे देणं होत नसेल तर तुझी बायको माझ्या घरी आणून सोड अशा प्रकारची भाषा वापरल्याचा देखील फिर्यादीमध्ये उल्लेख आहे.

या आणि अशाच प्रकारच्या सावकाराकडून होत असलेल्या जाचाला कंटाळूनच राम फटालेंनी आत्महत्या केल्याचं आता स्पष्ट होत आहे. यामुळे बीड शहरातील हे प्रकरण अतिशय गंभीर बनलं असून सावकारावर कडक कारवाई करण्याची मागणी होत आहे.