सध्या सोने चांदीचे भाव हे गगनाला भिडले आहे. दिवसेंदिवस सोने चांदीचे भाव कमी जास्त होत आहे. तसेच सोने चोरीच्या घटना ही वाढताना दिसत आहे. अशातच राजस्थानच्या नागौर जिल्ह्यातून नुकतीच एक अतिशय धक्कादायक आणि मजेशीर घटना समोर आली आहे. सहसा चोरीच्या बातम्यांमध्ये माणसांची चर्चा होते, पण यावेळी मात्र चोरी करणारा चक्क कबूतर निघाला आहे.

स्थानिक माध्यमांच्या माहितीनुसार, नागौरच्या डेगाणा भागात एका ज्वेलरी दुकानाच्या वरच्या मजल्यावर सोन्याचे काम सुरू होते. त्या ठिकाणी एक कारागीर सोन्याची साखळी तयार करत होता. याच वेळी अचानक एक कबूतर तेथे आले आणि सर्वांनाच चकित करणारी कृती केली. त्या कबुतराने सोन्याची साखळी आपल्या चोचीत पकडली आणि क्षणात उडून गेले. मात्र ही गोष्ट इथेच थांबली नाही.

या खोडकर कबुतराने ती साखळी थेट आपल्या गळ्यात घातली आणि संपूर्ण परिसरात उडत फिरू लागले. यामुळे परिसरातील लोकांना एकच आश्चर्याचा धक्का बसला. कबुतराच्या गळ्यातील सोन्याची साखळी पाहून अनेकांनी त्याचे व्हिडीओ आणि फोटो काढले. हे व्हिडीओ आणि फोटो सध्या सोशल मीडियावर मोठ्या प्रमाणात व्हायरल होत आहेत.