राज्यातील शाळांमध्ये पहिलीपासून हिंदी सक्तीच्या मुद्यावरून राज आणि उद्धव ठाकरे यांनी एकत्र येण्याचा निर्णय घेतला आहे. 5 जुलै रोजी मुंबई येथील गिरगाव चौपाटी ते आझाद मैदानापर्यंत काढण्यात येणाऱ्या मोर्चात हे दोन्ही नेते सहभागी होणार आहेत. खासदार संजय राऊत यांनी आज ट्विट करत यासंदर्भात घोषणा केली. याचाच एक भाग म्हणून आज आदित्य ठाकरे आणि मनसेचे नेते संदीप देशपांडे यांची भेट झाली आहे. एका वृत्तवाहिनीच्या कार्यक्रमात या दोघांची भेट झाली आहे. यावेळी दोघांनीही एकमेकांना हस्तांदोलन करत एकमेकांची विचारपूस केली. या भेटीनंतर आता मनसे आणि ठाकरे गटात स्थानिक पातळीवरील कार्यकर्त्यांमध्ये मनोमीलनाच्या घडामोडीला वेग आला आहे.