राज्यात सध्या महानगरपालिका निवडणूकीची रणधुमाळी सुरू आहे. प्रचारासाठी सर्वच राजकीय पक्षांचे नेते ठिकठिकाणी प्रचारासाठी भेटी देत आहेत. महाराष्ट्र नवनिर्माण सेनेचे अध्यक्ष राज ठाकरे हे देखील शाखांना भेटी देत आहेत. कल्याण येथून शाखा भेटींचा कार्यक्रम संपवून भिवंडी मार्गे ठाण्याच्या दिशेने जात असताना राज ठाकरेंची नजर ठाणे- भिवंडी सीमेवरील खारेगाव खाडीच्या पुलाजवळ असलेला बॉम्बे ढाब्यावर गेली. या ढाब्यावर अजूनही बॉम्बे ढाबा हे नाव असल्याची बाब राज ठाकरे यांनी आपल्यासोबत असलेले ठाणे आणि पालघर जिल्हाप्रमुख अविनाश जाधव यांच्या लक्षात आणून दिली.

त्यानंतर राज ठाकरे यांनी दिलेल्या आदेशानंतर महाराष्ट्र नवनिर्माण विद्यार्थी सेना ठाणे जिल्हा प्रमुख परेश चौधरी आपल्या सहकाऱ्यांसह बॉम्बे ढाबा येथे धाव घेत ढाबा व्यवस्थापकाला येथील नाव तत्काळ बदलण्याचे, येथील विद्युत साईन बोर्ड बंद करण्याचे आदेश दिले. या ढाब्यचे नाव मुंबई करण्यात यावे असे ते म्हणाले. यावेळी संतप्त झालेल्या मनसैनिकांनी बॉम्बे ढाब्याचे नामफलक फाडून आपला संताप व्यक्त केला.