राज्यात २९ महानगरपालिकांच्या मतदानासाठी सर्व पक्ष सज्ज झाले आहेत. काल प्रचाराच्या तोफा थंडावल्या. मात्र निवडणुकांमध्ये बरेच उमेदवार बिनविरोध निवडून आल्याचं चित्र २०२६च्या महापालिका निवडणुकी दरम्यान पाहायला मिळालं. राज्यातील २९ महानगरपालिकांमध्ये मतदान होण्यापूर्वीच ६६ उमेदवार विजयी झाले आहेत. निवडणुका बिनविरोध करण्यात भाजपाने आघाडी घेतली असून आतापर्यत भाजपाचे ४४ उमेदवार बिनविरोध विजयी झालेत. त्यापाठोपाठ निवडणुका बिनविरोध करण्यात शिंदेंच्या शिवसेनेने दुसरा क्रमांक पटकावला आहे. या विरोधात मनसे नेते अविनाश जाधव यांनी याचिका दाखल केली होती, मात्र ती याचिका फेटाळून लावण्यात आली आहे. उमेदवार बिनविरोध निवडून आला असेल तरीही मतदारांसाठी नोटाचा पर्याय असावा, अशी मागणी याचिकेत करण्यात आली होती. मात्र, न्यायालयाने याचिकाकर्त्यांना खडे बोल सुनावत ही याचिका फेटाळून लावली. तुम्ही न्यायालयात सकाळी चुकीची विधानं केली. रिट पिटिशन आणि आधीच्या याचिकेत सार्धम्य असल्याचे सांगितले. मात्र, यामध्ये काहीही साम्य आढळून आलेले नाही. त्यामुळे आम्ही याचिकाकर्त्यांना दंड ठोठावत असल्याचे सुरुवातीला न्यायमूर्तींनी सांगितले.