महाराष्ट्र हा संपूर्णपणे हिंदुत्वाने भारावलेला आहे. या हिंदुत्वाला तडा घालण्याचं काम प्रामुख्याने शरद पवारांनी केलं आहे. त्यांनी जाती-जातीमध्ये भेद निर्माण केले, असा घणाघात मनसे अध्यक्ष राज ठाकरे यांनी केला आहे. डाफोडीचे राजकारण राष्ट्रवादी काँग्रेस पक्षाच्या जन्मानंतर चालू झाले आहे. राजकीय पक्ष मेले तरी चालतील पण महाराष्ट्र जगला पाहिजे, असंही राज ठाकरे यावेळी म्हणाले. शिवडी मतदारसंघातील लालबाग येथील प्रचार सभेत आज ते बोलत होते.

पुढे बोलताना राज ठाकरे म्हणाले की, आता आपण महाराष्ट्र बाहेर काढू. उद्या मनसे असो, शिवसेना असो, भाजप असो, काँग्रेस असो, एनसीपी असो हे सगळे पक्ष मेले तरी चालतील पण महाराष्ट्र जगला पाहिजे, हे मी माझ्या अनेक सभांमधून सांगितलं आहे. उत्तर प्रदेश, बिहार आणि झारखंडमध्ये जसे राजकारण चालते तसे महाराष्ट्राचे होऊ नये. महाराष्ट्रातला एकोपा, आमच्या संतपरंपरा, आमच्या संतांनी दिलेली शिकवण एकत्र राहण्याची शिकवण, सगळं विसरून चाललोय आपण. का? यांच्या स्वार्थी राजकारणासाठी, का? राष्ट्रवादी काँग्रेसच्या स्वार्थी राजकारणासाठी, असा हल्ला यावेळी बोलताना राज ठाकरेंनी चढवला आहे.

यावेळी उद्धव ठाकरे यांच्यावर देखील राज ठाकरेंनी नाव न घेता निशाणा साधला. शिवसेना भाजपला मतदारांनी मतदान केलं. मात्र शिवसेना फुटली, ज्यांच्या विरोधात निवडणूक लढवली त्याच विरोधकांच्यासोबत स्वतःच्या स्वार्थासाठी जाऊन आघाडी करत सत्ता स्थापन केली. हा मतदारांच्या मताचा अपमान त्यांनी केला, असा टोला उद्धव ठाकरे यांचं नाव न घेता त्यांनी लगावला आहे.

Edited By Rakhi Rajput