राज्यात एकीकडे उन्हाचा चटका वाढत असतानाच दुसरीकडे हवामान बदलामुळे पावसाचे संकट उभं ठाकलंय. हवामान विभागाने विदर्भ, मराठवाडा आणि मध्य महाराष्ट्रात ७२ तासांचा वादळी वाऱ्यासह पावसाचा इशारा दिला आहे. प्रामुख्यानं यवतमाळ, चंद्रपूर आणि धाराशिव जिल्ह्यांत विजांच्या कडकडाटासह पावसाची शक्यता वर्तवण्यात आली आहे. या पावसामुळे नागरिकांना सतर्क राहण्याचे आवाहन हवामान खात्याकडून करण्यात आलं आहे.

राज्यात एकीकडे उकाडा वाढला आहे. तापमानाचा पारा चढला असून उष्णता वाढली आहे. उकाड्यामुळे नागरिकांच्या अंगाची लाहीलाही होत आहे. विदर्भातील तापमानाचा पारा ४० अंश सेल्सिअसच्या पार गेला आहे. त्यामुळे अनेक ठिकाणी शाळांच्या वेळा बदलण्यात आल्या आहेत. दुपारी भरणारी शाळा सकाळी भरवण्यात येणार आहे.