नाशिक : स्वातंत्र्यवीर सावरकर यांची बदनामी केल्याच्या आरोप प्रकरणात काँग्रेसचे नेते राहुल गांधी यांना न्यायालयात हजर राहण्याचे आदेश देण्यात आले आहेत. नाशिक न्यायालयात त्यांना प्रत्यक्ष हजर राहण्यास सांगितले आहे. सुनावणीला व्हिडिओ कॉन्फरन्सिंगद्वारे हजर राहता येणार नाही. प्रत्यक्ष हजर राहून जामीन घेण्याचे आदेश न्यायालयाने दिले आहेत. यासंदर्भात याचिकाकर्त्यांचे वकील मनोज पिंगळे यांनी माहिती दिली आहे.

या प्रकरणी पुढील सुनावणी मे महिन्यात होणार आहे. न्यायालयात सर्व समान असल्याचं मतही निर्देश देताना मांडलं. राहुल गांधी यांनी भारत जोडो यात्रेच्या वेळी सावरकर यांच्याबद्दल वक्तव्य केलं होतं. त्यानंतर सावरकर प्रेमींनी प्रचंड रोष व्यक्त केला होता. त्यांच्यामार्फत तक्रारही करण्यात आली होती. या प्रकरणी नाशिकमधील सरकारवाडा पोलीस ठाण्यात गुन्हा नोंदवण्यात आला होता.