पुणे शहरातील धरणसाखळी क्षेत्रात पावसाचा जोर वाढला आहे. त्यामुळे शहराला पाणीपुरवठा करणाऱ्या धरणांमधील पाणीसाठ्यात झपाट्याने वाढ झाली आहे. खडकवासला प्रकल्पातील चारही धरणांमधील एकूण पाणीसाठा जवळपास 90 टक्क्यांवर पोहचलाय. त्यामुळे पुणेकरांवरील पाणीकपातीचं संकट टळलं असून वर्षभराची चिंता मिटली आहे.

पाणीपुरवठा विभागाने जारी केलेल्या आकडेवारीनुसार, पुणे शहराला पाणीपुरवठा करणाऱ्या खडकवासला धरणात आतापर्यंत 81.43 टक्के पाणीसाठा जमा झालाय. तर पानशेत धरणात 91.76 टक्के इतका पाणीसाठा आहे. त्याचबरोबर वरसगाव धरण 86.75 टक्के आणि टेमघर धरणातील पाण्याची टक्केवारी 88.48 इतकी आहे.

हवामान खात्याने पुणे जिल्ह्याला आजपासून पुढील दोन दिवस पावसाचा ऑरेंज अलर्ट जारी केला आहे. त्यामुळे धरणांमधील पाणीसाठ्यात आणखीच वाढ होण्याची शक्यता आहे. सध्या खडकवासला धरणातून मोठ्या प्रमाणात पाण्याचा विसर्ग करण्यात येत असल्याने नदीकाठच्या गावांना सतर्कतेचा इशारा देण्यात आलाय.