पुणे : पीएमपी बसच्या चाकामध्ये पाय अडकून महिलेचा मृत्यू झाल्याची दुर्दैवी घटना समोर आली. पुण्यातील दांडेकर पुलाजवळील ही दुर्दैवी घटना घडली. पीएमपी बसमध्ये चढत असताना चाकामध्ये पाय अडकला. यामुळे ही गंभीर जखमी झालेल्या महिलेचा मृत्यू झाल्यानं हळहळ व्यक्त केली जातेय. काशीबाई खुंरगळे असे मृत्युमुखी पडलेल्या महिलेचे नाव आहे. या प्रकरणी त्यांचा मुलगा मल्हारी पांडुरंग खुरंगळे यांची पर्वती पोलिस ठाण्यात तक्रार दाखल केलीय. त्यावरुन पीएमपी बसचालक दिलीपराव वामनराव लहाने यांच्या विरुद्ध गुन्हा दाखल करण्यात आलाय. सोमवारी दुपारी पीएमपी बसमध्ये पाठीमागील दरवाजातून ही महिला चढत होती. परंतु त्यावेळी बसचालकाने निष्काळजीपणे बस चालवल्याचा आरोप करण्यात आलाय. त्यामुळे महिलेचा डावा पाय बसच्या चाकामध्ये अडकला. त्यात त्या गंभीर जखमी झाल्या होत्या. दरम्यान त्यांच्यावर सुरू असलेल्या उपचारादरम्यान त्यांचा मृत्यू झाला.