पुण्यातील कोपा मॉल स्फोटानं उडवून देण्याची धमकी देण्यात आली. पुण्याच्या मुंढवा भागात हा मॉल आहे. मॉल व्यवस्थापनाच्या आयडीवर हा धमकीचा मेल आला. त्यानंतर एकच धावपळ उडाली. या प्रकरणी मुंढवा पोलीस ठाण्यात गुन्हा दाखल करण्यात आला.

हा सगळा प्रकार सोमवारी सकाळी ७ वाजून २१ मिनिटांच्या दरम्यान उघडकीस आला. या प्रकरणात ४५ वर्षीय व्यक्तीने पोलिसांत तक्रार दाखल केली होती. पोलिसांच्या माहितीनुसार, पुण्याच्या मुंढवा परिसरात कोपा मॉल आहे. सोमवारी सकाळी ७.२१ मिनिटांनी मॉलच्या व्यवस्थापनाच्या इमेल आयडीवर एक मेल येऊन धडकला. मॉलमध्ये बॉम्ब ठेवला असल्याचं त्यात नमूद करण्यात आलं होतं. याबाबत व्यवस्थापनाने तात्काळ पोलिसांना कळवले. पोलिसांनी मॉलमध्ये जाऊन पाहणी केली. त्यावेळी सर्व परिस्थिती नियंत्रणात होती. कोणीतरी खोडसाळपणा म्हणून हा धमकीचा मेल केल्याचं आढळून आलं. या प्रकरणी अज्ञात व्यक्तीविरोधात पोलिसांनी गुन्हा नोंदवला आहे.