पुणे जिल्हाला मुसळधार पावसानं झोडपलं आहे.पुण्यात सुरू असलेल्या मुसळधार पावसामुळे दिवेघाटातील धबधबे भरून वाहू लागले असून, काही धबधब्यांनी रुद्ररूप धारण केले आहे. घाट परिसरात पडलेल्या जोरदार पावसामुळे घाटातून मोठ्या प्रमाणात पाणी वाहत आहे. वाहणाऱ्या पाण्याचा जोर पहाता पालखी सोहळ्या दरम्यान प्रशासनाला यावर्षी पाऊस डोकेदुखी ठरण्याचे स्पष्ट संकेत दिसत आहेत.

पावसाच्या वेगामुळे रस्त्यांवर राडारोडाही वाहून जात आहे. विशेषतः घाटातील रुंदीकरणाचे काम सुरू असल्याने माती आणि खडीचा ओघ रस्त्यावर निर्माण होत असून वाहतुकीस अडथळा निर्माण होत आहे. पाण्याचा वेग पाहता वाहनचालकांनी विशेष सावधगिरी बाळगली आहे.येत्या काही दिवसांत पावसाचा जोर असाच राहिल्यास, दिवेघाटातून पालखी मार्ग सुरक्षित ठेवण्यासाठी प्रशासनाला अधिक प्रयत्न करावे लागणार आहेत.