Pune Gangster Shahrukh Encounter at Solapur : मोहोळ तालुक्यातील लांबोटी (पुणे) येथे शनिवारी रात्री पुणे क्राइम ब्रांच आणि मोहोळ पोलिसांच्या संयुक्त कारवाईत सराईत गुन्हेगार शाहरुख उर्फ अट्टी रहीम शेख (रा. सय्यद नगर, हडपसर, पुणे) ठार झाला. शेखवर पुणे शहर आणि जिल्ह्यातील हडपसर, वानवडी, कोंढवा, काळेपडळ पोलिस ठाण्यांत १५ गंभीर गुन्हे दाखल होते. मकोका अंतर्गत कारवाई झालेला शेख फरार होता.

पुणे क्राइम ब्रांचला शेख लांबोटी येथे नातेवाइकांकडे असल्याची माहिती मिळाली होती. त्यानुसार रात्री पोलिसांनी छापा टाकला. पोलिसांना पाहताच शेखने पिस्तूलातून गोळीबार केला. प्रत्युत्तरात पोलिसांनी केलेल्या गोळीबारात शेख जागीच ठार झाला. घटनेची माहिती मिळताच सोलापूर ग्रामीणचे वरिष्ठ पोलीस अधिकारी मोहोळ पोलिस ठाण्यात दाखल झाले. या घटनेची चौकशी सुरू आहे.