पुणे: येथील एका कार चालकाने एकाचवेळी 12 विद्यार्थ्यांना भरधाव कार चालवत उडवून देण्याची घटना ताजी असतानाच आता अजून एक भयानक घटना समोर आली आहे. पुणे येथील भापकर पेट्रोल पंपाजवळ असलेल्या बस स्टॉपजवळ दारूच्या नशेत एका कार चालकाने थेट गाडी बस स्टॉपवर घातली. सुदैवाने यामध्ये कुठलीही जीवितहानी झाली नाही. मात्र पुणे शहरामध्ये वारंवार अशा घटना घडताना दिसत आहे.

मिळालेल्या माहितीनुसार, हा सगळा प्रकार ३० मे रोजी रात्री ११ वाजता पुणे - सातारा रस्त्यावरील पंचमी चौकाजवळ असलेल्या भापकर पेट्रोल बस स्टॉप वर घडला. कारचालक गणेश गोरख जेवे हा त्याच्या ताब्यातील (MH12 KT 4764) गाडी दारू पिऊन चालवत होता. अचानक त्याचे गाडीवरचे नियंत्रण सुटले आणि त्याने थेट गाडी बस स्टॉप वर चढवली. सुदैवाने रात्रीची वेळ असल्याने तिथे प्रवासी नव्हते म्हणून अनर्थ टळला. पोलिसांनी तात्काळ घटनास्थळी धाव घेत चालकाला ताब्यात घेतले. पोलिसांनी वाहन ताब्यात घेऊन वाहन चालकाचा परवाना रद्द करण्यासाठी अहवाल पाठवला आहे.