न्यायव्यवस्थेला हादरवून टाकणाऱ्या सामच्या बातमीचे विधानसभेत आज पडसाद उमटले. काँग्रेस आमदार नाना पटोलेंनी साम टीव्हीने उघडकीस आणलेल्या बातमीचा विधानसभेत मुद्दा उपस्थित करून खोटा निकाल तयार करण्याची हिंमतच कशी होते. असा सवाल त्यांनी यावेळी विधानसभेत विचारला. त्यावर विधानसभा अध्यक्ष राहुल नार्वेकर यांनी चौकशी करुन दोषींवर फौजदारी कारवाई करण्याचे आदेश सरकारला दिले.

पुणे न्यायालयाच्या न्यायाधीशांच्या आदेशाची खोटी ऑर्डर सादर करत एका प्रकरणातील आरोपींनी जामीन मिळवला आहे. ही धक्कादायक घटना घडलीय ती शिक्षणाचे माहेर घर म्हणून ओळख असलेल्या पुण्यात. सही असलेली एक खोटी ऑर्डर जोडून फसवणुकीच्या प्रकरणातील आरोपींनी चक्क मुंबई उच्च न्यायालयाची दिशाभूल केली. या सर्व प्रकरणाचा काल साम टीव्हीने पर्दाफाश केला. त्यानंतर सरकार खडबडून जागे झाले. या सर्व घटनेची गृहराज्यमंत्री पंकज भोयर यांनी देखील दखल घेऊन कडक कारवाई करण्याचे आदेश दिले आहेत.