पुण्यातील भोरमधून एक मोठी बातमी समोर येत आहे. भोरमध्ये दोन गटांत तुफान राडा झाल्याची माहिती मिळत आहे. आजी आणि माजी आमदारांच्या कार्यकर्त्यांमध्ये ही हाणामारी झाल्याचे समजते. विद्यमान आमदार शंकर मांडेकर आणि माजी आमदार संग्राम थोपटे यांच्या कार्यकर्त्यांची मतदान केंद्राबाहेर मोठ्या प्रमाणात गर्दी जमा झाली असून तणावाचे वातावरण आहे.

कार्यकर्त्यांमध्ये शाब्दिक बाचाबाची आणि धक्काबुक्की झाल्याचे पहायला मिळाले. या घटनेमुळे परिसरात खळबळ उडाली आहे. भोरच्या अनेक भागात कार्यकर्त्यांमध्ये संघर्ष झाल्याचे वृत्त आहे. पोलिसांनी घटनास्थळी धाव घेतली असून परिस्थिती नियंत्रणात आणण्याचे प्रयत्न सुरू आहेत. मतदानाच्या दिवशीच हा प्रकार घडल्याने राजकीय वर्तुळात चर्चांना उधाण आले आहे. या राड्यामुळे काही काळ तणाव निर्माण झाला होता. नक्की काय घडलं आणि वाद कशामुळे झाला, याची सविस्तर माहिती अद्याप समोर आलेली नाही. मात्र, दोन गटांतील या संघर्षामुळे कायदा आणि सुव्यवस्थेचा प्रश्न निर्माण झाला आहे.