राजगुरूनगर येथील दुहेरी हत्याकांड प्रकरणाचे पडसाद आता राजगुरूनगर शहरात उमटताना दिसत आहेत. आज या प्रकरणी आरोपीला फाशीची शिक्षा देण्यात यावी अशी मागणी करत नागरिकांनी आंदोलन केलं आहे. राजगुरूनगर पोलीस स्टेशन बाहेर पुणे नाशिक महामार्गावर आंदोलकांनी आंदोलन केल्याने हा महामार्ग काही काळ वाहतुकीसाठी बंद होता. यावेळी वाहनांच्या रांगा लागलेल्या बघायला मिळाल्या.

पुण्याच्या राजगुरूनगर येथे घराबाहेर खेळत असताना दोन चिमुकल्या बहीणी अचानक बेपत्ता झाल्या होत्या. त्यानंतर एका इमारतीच्या बाजूला दोन्ही मुलींचे मृतदेह एका पिंपामध्ये आढळून आले होते. या मुलींची हत्या पीडित कुटुंबाच्या घरा शेजारी राहणाऱ्या एका आचाऱ्याने केल्याचं पोलिस तपासातून उघडकीस आलं. या घटनेने आता नातेवाईक आणि राजगुरूनगर शहरातील नागरिकांकडून संताप व्यक्त केला जात आहे. या नराधम आरोपीला फाशीची शिक्षा द्यावी या मागणीसाठी आज राजगुरू पोलीस स्टेशन बाहेर आंदोलन करण्यात आलं. यावेळी पुणे नाशिक महामार्ग आंदोलकांनी रोखून धरला.