कोकणातील शिंदे गटाचे रामदास कदम यांनी सार्वजनीक बांधकाम मंत्री रवींद्र चव्हाण यांच्यावर टीका केली होती. त्यामुळे महायुतीत वाद उफाळलेला पाहायला मिळाला होता. शिवाय अजित पवार यांच्या ताफ्याला देखील पुण्यात भाजपकडून काळे झेंडे दाखवण्यात आले होते. त्यामुळे महायुतीतील अंतर्गत वाद चव्हाट्यावर आला आहे. यावर आता भाजप नेते प्रवीण दरेकर यांनी प्रतिक्रिया दिली आहे. महायुतीत सारं अलबेल असल्याचं प्रवीण दरेकर यांनी सांगितलं आहे. आणखी अलबेल राहण्यासाठी जबाबदार नेत्यांना जबाबदारीने वागणं गरजेचं असल्याचंही ते म्हणाले. रामदास कदम हे ज्येष्ठ नेते आहेत त्यांनी जेष्ठत्वासारखं बोललं पाहिजे. बालिशपणाचे वक्तव्य त्यांच्याकडून अपेक्षित नाही. महायुती टिकण्यासाठी महायुतीतील सर्व घटक पक्षाच्या नेत्यांनी जबाबदारीने आणि संयमाने बोललं पाहिजे असं प्रवीण दरेकर यांनी सांगितलं आहे.